2Cor 1 | NdeIBE | STEP | UPhawuli, umphostoli kaKhristu uJesu ngentando kaNkulunkulu, loThimothi umzalwane wethu, Ebandleni likaNkulunkulu eKhorinte, kanye lakubangcwele bonke kulo lonke elase-Akhayiya:

2 Corinthians 1

1 UPhawuli, umphostoli kaKhristu uJesu ngentando kaNkulunkulu, loThimothi umzalwane wethu, Ebandleni likaNkulunkulu eKhorinte, kanye lakubangcwele bonke kulo lonke elase-Akhayiya:

2 Umusa lokuthula okuvela kuNkulunkulu uBaba laseNkosini uJesu Khristu kakube kini.

UNkulunkulu Wenduduzo Yonke

3 Kabongwe uNkulunkulu uYise weNkosi yethu uJesu Khristu, uYise wesihawu loNkulunkulu wendunduzo yonke, 4 osiduduzayo kuzo zonke izinhlupheko zethu, ukuze lathi siduduze abasekuhluphekeni ngenduduzo esiduduzwe ngayo nguNkulunkulu. 5 Ngoba njengoba izinhlupheko zikaKhristu zigelezela ekuphileni kwethu, ngakho ngokunjalo futhi ngoKhristu induduzo yethu iyaphuphuma. 6 Uma sidabukile, kungenxa yenduduzo yenu lensindiso; uma siduduzekile, kungenxa yokududuzwa kwenu, okulenza liqinisele ekubekezeleleni zona lezo zinhlupheko ezisihluphayo. 7 Ithemba lethu ngani liqinile, ngoba siyakwazi ukuthi njengoba lahlanganyela ekuhluphekeni kwethu, ngokunjalo liyahlanganyela ekududuzweni kwethu.

8 Kasithandi, bazalwane, ukuba libe ngabangaziyo ngobunzima esabuzwayo esifundeni sase-Asiya. Sasilokucindezeleka okukhulu, okungaphezu kwamandla ethu okokubhensela, saze saphelelwa lalithemba lokuphila. 9 Impela isigwebo sokufa sasizwa ezinhliziyweni zethu. Kodwa lokhu kwenzakala ukuze singazithembi thina ngokwethu kodwa uNkulunkulu, ovusa abafileyo.

10 Wasihlenga engozini ebulalayo, njalo uzasikhulula. Ithemba lethu silibeke kuye ukuba uzaqhubeka ngokusihlenga, 11 lapho lisisiza ngemikhuleko yenu. Abanengi bazasibongela ngenxa yomusa omangalisayo esiwuphiweyo emva kwemikhuleko yabanengi.

UPhawuli Uguqula Amalungiselelo

12 Nanku ukuzincoma kwethu: Isazela sethu siyafakaza ukuthi sibe lokuziphatha emhlabeni, ikakhulu kubudlelwano bethu lani, kubo ubungcwele lobuqotho obuvela kuNkulunkulu. Lokhu kasikwenzanga mayelana lokuhlakanipha kwasemhlabeni kodwa mayelana lomusa kaNkulunkulu. 13 Ngoba kasililobeli ngolutho elingeke lilubale loba liluqedisise. Njalo ngiyathemba ukuthi,

14 njengoba seliqedisisa okunye ngathi, lizaqedisisa okupheleleyo lizincome ngathi njengoba lathi sizazincoma ngani ngosuku lweNkosi uJesu.

15 Ngokuba ngangilethemba kulokhu, ngaceba ukwethekela lina kuqala ukuze lisizakale kabili. 16 Ngaceba ukulethekela ohambeni lwami lokuya eMakhedoniya, ngibuye kini futhi sengivela eMakhedoniya, libe selingithuma-ke ohambeni lwami lokuya eJudiya.

17 Ekulungiseni kwami lokhu, ngakwenza kalula na? Kanje ngenza amalungiselelo ami ngendlela yasemhlabeni ukuba sikhathi sinye ngithi, “Yebo, yebo,” njalo ngisithi, “Hatshi, hatshi,” na?

18 Kodwa ngeqiniso njengoba uNkulunkulu ethembekile ilizwi lethu kini kalisikuthi “Yebo,” lokuthi, “Hatshi.” 19 Ngoba iNdodana kaNkulunkulu, uJesu Khristu, eyatshunyayelwa kini yimi loSila kanye loThimothi, yayingasuye u“Yebo” lo “Hatshi,” kodwa kuyo kokuphela kwakungu “Yebo.” 20 Ngoba lanxa zizinengi kangakanani izithembiso uNkulunkulu azenzileyo, zingu “Yebo” kuKhristu. Ngakho ngaye u“Ameni” utshiwo yithi sidumisa uNkulunkulu.

21 Njalo nguNkulunkulu owenza thina kanye lani siqine kuKhristu. Wasigcoba, 22 wasibeka uphawu lwakhe lokuba ngabakhe, wabeka loMoya wakhe ezinhliziyweni zethu njengesibambiso, eqinisela okuzayo.

23 Ngibiza uNkulunkulu ukuba ngufakazi wami ukuthi kangibuyanga eKhorinte ukuze ngingalikhathazi. 24 Akusikuthi silibamba ngamandla ekukholweni kwenu, kodwa sisebenza lani ukuze lithokoze, ngoba liqine ngokholo.